په‌شۆكاو و جه‌زره‌به‌دراو: گه‌ڕانه‌وه‌يه‌كى سه‌ختى ئێزدييه‌ ڕفێنراوه‌كانى بنده‌ستى داعش

وەرگێڕانی لە ئینگلیزییەوە: ئاسۆ کەریم

ئێزدييه‌ ڕفێنراوه‌كان پاش سه‌ركه‌وتن به‌سه‌ر ده‌وڵه‌تى ئيسلامى (داعش)دا، له‌گه‌ڵ كه‌سوكار و خێزانه‌كانى خۆياندا يه‌ك ده‌گرنه‌وه‌. له‌نێو ئه‌و ڕفێنراوانه‌دا، منداڵ و زارۆى وه‌تۆى تێدان كه‌ ته‌واو په‌شۆكاون. له ‌كاتێكدا ئه‌وان ديل و يه‌خسير بوون، داعش مێشكى شوشتوونه‌ته‌وه‌ و تێى گه‌ياندوون كه‌ دايك و باوكيان خراپ و به‌دفه‌ڕ و ناساڵحن.

ڕانيا سه‌لوم

ئاڵان ئێزدۆ، منداڵێكى ته‌مه‌ن 11 ساڵانه‌يه‌، به‌رى چاوى چاڵ و قۆرتى قووڵى تێدايه‌، به‌ته‌نيا له‌ هۆده‌ى  دايك و بابى له‌ شه‌نگال ڕووده‌نيشێ. شه‌نگال شارێكى ئێزدينشينه‌ له‌ باكوورى عێراقدا. يه‌كبێنه‌ قاچ و قولى ده‌هه‌ژێنێته‌وه‌ و نيگايه‌كى خه‌مناكانه‌ى هه‌يه‌. ناوه‌ ناوه‌ چه‌فييه‌كه‌ى دێنێته‌ سه‌ر لا چاوه‌كانى و خۆى له‌ برا بچووكه‌كه‌ى ناگه‌يه‌نێ‌ كه‌ فه‌رامۆشى پێ دێ و چاوه‌ڕوانه‌ سه‌رنجێكى گچكه‌ى بداتێ.

به‌يانييه‌كه‌ى، ئاڵان هه‌ر زوو به‌ زوو باوكى خۆى ده‌ناسێته‌وه‌ و خۆى تێ وه‌رده‌هێنێ. ده‌خيل ئێزدۆ، پياوێكى ته‌ژه‌ى به‌سێمڵه‌، له‌ نزيك كوڕه‌كه‌يه‌وه‌ ڕاده‌وه‌ستێ و به‌كه‌يفخۆشيیه‌وه‌ باس له‌و ديمانه‌يه‌ى نێوان باوك و كوڕ ده‌كا. ئاڵان، له‌ لايه‌كه‌ى ديكه‌وه‌، هه‌ر زوو بێده‌نگ و مات ده‌بێ و خۆى ده‌باته‌ غه‌رێفێ.

له‌م ڕۆژه‌ى مانگى ئاداردا، ئاڵان ته‌نيا هه‌فته‌يه‌كه‌ به‌ دايك و باوكى خۆى شاد بووه‌ته‌وه‌. پاش ئه‌وه‌ى له ‌لايه‌ن داعشه‌وه‌ ده‌ڕفێندرێ، بۆ ماوه‌ى چوار ساڵ و نيوێك له‌ دايك و باوكى جودا ده‌بێته‌وه ‌و داده‌بڕێ. دواجار كه‌ ئاڵان چاوى به‌ دايك و باوكى كه‌وتبێ، ڕۆژى 3ى ئابى 2014 بووه‌؛ واته‌ ئه‌و ڕۆژه‌ى كه‌ ميليشياكانى داعش په‌لامارى شاره‌كه‌ ده‌ده‌ن.

دايك و باوكى ئاڵان هه‌وڵ ده‌ده‌ن ئه‌و ده‌مه‌ بيپارێزن و له‌گه‌ڵ كوڕ و كچه‌ مامه‌كانى به‌ڕێى ده‌كه‌ن، لێ ئه‌وان ده‌كه‌ونه‌ ده‌ست داعش. ئاڵان كه‌ ئه‌و وه‌خته‌، ته‌مه‌نى 7 ساڵان بووه‌، له‌گه‌ڵ پسمام و دۆتمامه‌كانى ده‌ڕفێندرێ. دايك و باب و دوو كوڕه‌ بچووكتره‌كه‌يان ڕێچكه‌يه‌كى ديكه‌ ده‌گرن و ڕا ده‌كه‌ن. حكوومه‌تى  هه‌رێمى كوردستان ده‌ڵێ داعش به‌گشتى 6417 ژن و منداڵى ئێزدیى ڕفاندووه‌. له‌ زۆربه‌ى حاڵه‌ته‌كاندا، ئه‌و پياوانه‌ى ده‌گيرێن، يه‌كجێ كۆمه‌ڵكوژ ده‌كرێن و به‌گشتى و به‌ لانى كه‌مه‌وه‌ 1293 كه‌سيان لێ كوژراوه‌.

دادگه‌ييكردنێكى مه‌رگ و كاولكارى

ليستى ئه‌و تاوان و جينايه‌تانه‌ى داعش ئه‌نجامى داون، ليستێكى درێژ و سه‌رسوڕهێنه‌. تا ئێستا كوشتوبڕ و به‌كۆيله‌كردنى هه‌زاران ئێزدى له‌ ناوچه‌ى شه‌نگال شو‌ێنێكى تايبه‌تى له‌ مێژوودا ده‌گرێ. جيهادييه‌كان به‌ "كافر"يان ناو ده‌به‌ن، له‌وما ده‌كرێ ئازادانه‌ و بێ پرينگانه‌وه‌، ده‌ستدرێژييان بكرێته‌ سه‌ر و به‌كۆيله‌ بكرێن و بكوژرێن.

بگره‌ ئه‌و له‌نێوبردنه‌ى كۆميونيته‌ى ئێزدى له‌ ناوچه‌ى شه‌نگالدا وه‌كوو نه‌ته‌وه‌ يه‌كگرتووه‌كان وه‌سفى كردووه‌ "جينۆسايد"ه‌‌. به‌ مه‌زه‌ندان 550000 ئێزدى به‌ر له‌و هێرش و په‌لاماره‌ى تيرۆريستان، له‌ عێراقدا ده‌ژيان و ده‌وروبه‌رى 360 هه‌زارێكيان له‌ كه‌مپه‌كانى ئاواراندا نيشته‌جێن و، مه‌زه‌نده‌یش ده‌كرێ 100 هه‌زار كه‌سێكيان كۆچيان كردبێ، له‌وانه‌ بۆ ئه‌ڵمانيا، كه‌ له‌ ويلايه‌ته‌ جياجياكانى ئه‌ڵمانيا به‌رنامه‌ى تايبه‌ت بۆ ئه‌و قوربانييه‌ ئێزدييانه‌ داندراوه‌؛ هه‌روا له‌ كه‌نداو و ئوستراليایشدا به‌رنامه‌ى له‌م بابه‌ته‌ هه‌يه‌.

"خه‌لافه‌ت" كه‌ سه‌روه‌ختێ له‌ ڕووى پانتاييیه‌وه‌ به‌قه‌د ئوردن ده‌بوو، هه‌ره‌سى هێنا و داته‌پى. پێش مانگێك، هێزه‌كانى سوورياى ديموكرات كه‌ زۆرينه‌يان شه‌ڕڤانى كوردن، "باغوز"يان ڕزگار كرد كه‌ دوا گوندێ بوو له‌ سووريا به‌ده‌ست جيهادييه‌كان مابووه‌وه‌. ده‌وروبه‌رى 200 ئافره‌ت و منداڵى ئێزدى به‌م دواييیانه‌ توانيیان له‌ چه‌نگى داعش ڕا بكه‌ن كه‌ 50 كه‌سيان له‌ باغوز بوون.

ئاڵان ئێزدۆ به‌ خۆى و لينا ئێزدۆى دۆتمامى، كه‌ كيژێكى سپيكه‌له‌ى 12 ساڵه‌ى قژڕه‌شه،‌ له‌ باغوز گيريان خواردبوو. لينا ده‌ڵێ: هه‌وه‌ڵ جار هه‌ڵاتن بۆ كه‌مپى ئه‌لهۆل كه‌ زۆرينه‌ى ئه‌وێ خه‌ڵكى مه‌ده‌نين. ئاڵان له‌ بازگه‌ى ئاسايشى ميليشيا كورده‌كانى سووريادا كه‌ شه‌ڕى داعشيان ده‌كرد، خۆى بوارد. لێ لينا به زمانى دايك، به‌‌ كرمانجى پێى گوتن كه‌ ئه‌و و كوڕه‌ مامه‌كه‌ى ئێزديين. ميليشياكان ئه‌وانيان له‌ لايه‌نگران و پشتيوانانى داعش جودا كرده‌وه‌ و پاشان ڕه‌وانه‌ى عێراقيان كردنه‌وه‌.

تاكتيكگه‌لێكى ده‌غه‌ڵ

لينا ده‌ڵێ: "گه‌له‌ك كه‌يفا من هات كو من دايبابێت خۆ ديتنه‌ڤه‌." لينا چيديكه‌ چه‌فيه‌ و ده‌سرۆك له‌سه‌ر نانێ و گواره‌يه‌كى زێڕى له‌ گوێ كردووه‌ كه‌ هه‌رگيز له‌ ساى داعشدا ڕێگه‌ى پێ نه‌ده‌درا گواره‌ له‌ گوێ بكا. لێ تا ئێستایش لينا دڵنيا نييه‌ كه‌ چ ڕاسته‌ و چ هه‌ڵه‌يه‌. كه‌چى ئاڵان مته‌قى لێوه‌ نايه‌ و كڕ و بێده‌نگ‌. لينا، كه‌ كه‌سوكار له‌باره‌ى ئه‌و ساڵانه‌ى له‌ بنده‌ستى داعشدا پرسيارى لێ ده‌كه‌ن، به‌پێچوپه‌نا وه‌ڵام ده‌داته‌وه‌، وه‌ك بڵێى هه‌ست به‌ جۆرێ له‌ پابه‌ندبوون بكا له ‌به‌رانبه‌ر ئه‌و كه‌سانه‌ى ئه‌ويان فڕاندبوو و نابێ خيانه‌تيان لێ بكا.

له‌و ده‌مه‌ى له‌نێو داعشدا بوون، ئه‌وان و منداڵانى ديكه‌ به‌وه‌ خاپێنرابوون كه‌ گوايا دایك و باوكی ئه‌وان خراپ و نه‌گريسن و، ئێزدى كافرن و جێگه‌يان ته‌پانى بنى دۆزه‌خێيه‌. منداڵان ناچار كراون ببنه‌ ئيسلام و ڕۆژێ 5 جار نوێژان بكه‌ن و به‌مه‌یش قورتاريان ده‌بێ. ئاڵان تا هه‌نووكه‌یش پێ داده‌گرێ كه‌ ئه‌و موسڵمانه‌ و ئێزدى نييه‌؛ باوكى وا ده‌ڵێ. يه‌كه‌مين پرسيارى لينا، پاش گه‌ڕانه‌وه‌ى ئه‌وه‌ بووه‌: ئايا ڕاسته‌ ئێزدييه‌كان كه‌ ده‌مرن، يه‌كسه‌ر ده‌چنه‌ ناو ئاگرێكى هه‌ميشه‌ييیه‌وه‌؟

تاكتيكێكى غه‌دار: وا له‌ منداڵان كراوه‌ باوه‌ڕ و متمانه‌ به‌ دایك و باوكی خۆيان نه‌كه‌ن و، ناسنامه‌ى ئايينيى خۆيان له‌بير بكه‌ن و هه‌موو شتێكيان ده‌گه‌ڵ به‌كار هێناون كه‌ له‌ ئێزديايه‌تى بشۆردرێن. داعش ڕێوشوێنى هاوشێوه‌یشيان ده‌گه‌ڵ ئه‌و كچ و ژنانه‌دا به‌كار هێناوه‌ كه‌ ده‌ستدرێژييان كردوونه‌ته‌ سه‌ر. زۆر جاران پێيان گوتراوه‌ كه‌ ئه‌وان هه‌نووكه‌ ئێزدى نين و ئه‌گه‌ر بگه‌ڕێنه‌وه‌ لاى كه‌سوكاريان ئه‌وا ده‌كوژرێن.

كۆميونيته‌ى ئێزدى له‌مێژه‌ وه‌كوو كۆميونيته‌يه‌كى دابڕاوى گۆشه‌گير چاويان لێ ده‌كرێ. ئه‌و ئافره‌ته‌ى پێوه‌ندى له‌گه‌ڵ خه‌ڵكێكى ديكه‌ى خودان باوه‌ڕى ديكه‌دا بكا، كۆمه‌ڵه‌به‌ده‌ر ده‌كرێ؛ كوشتن له‌سه‌ر نامووس له‌نێو ئێزدييانيشدا شتێكى ده‌گمه‌ن نييه‌. لێ پاش كوشتوبڕى ئێزدييه‌كان به‌ده‌ستى داعش، بابه‌شێخ، پێشه‌واى ڕۆحيى ئێزدييان، له‌ فه‌توايه‌كدا بڕياری دا ئه‌و كه‌سانه‌ى ڕفێندراون، ده‌كرێ بگه‌ڕێنه‌وه‌ ناو كۆڕ و كۆمه‌ڵه‌ى خۆيان و وه‌ربگيرێنه‌وه‌ و ته‌نانه‌ت جۆره‌ ڕێوڕه‌سمێكى نوێى داهێنا: له‌ په‌رستگه‌ى لالشدا له‌ باكوورى عێراق، كه‌ شوێنێكى هه‌ره‌ گرنگ و پيرۆزى حه‌ج و زياره‌ت و ته‌وافى ئێزدييانه‌، ئه‌و ژنانه‌ى گه‌ڕاونه‌ته‌وه‌‌ له‌ ڕێوره‌سمێكى باپتيزمئاسادا، ئاوه‌مۆر ده‌كرێن. پاش ئه‌و ڕێوره‌سمه‌، ئه‌و ژنانه‌ به‌ پاكبووه‌وه‌ داده‌نران.

ئه‌و ئافره‌ته‌ى ڕێوره‌سمى باپتيزم (ئاوه‌مۆر) به‌ڕێوه‌ ده‌با ده‌ڵێ، هه‌نووكه‌ به ‌لانى كه‌مه‌وه‌ ڕۆژێ يه‌ك منداڵ يان ئافره‌تى جحێڵ دێنه‌ لالش. به‌ڵام ئه‌و منداڵانه‌ى له‌ ئافره‌تێكى ئێزدى له‌دايك بوون، پاش ده‌ستدرێژيكردنه‌ سه‌ريان له ‌لايه‌ن داعشه‌كانه‌وه‌، ئه‌وا به‌ موسڵمانيان داده‌نێن. هه‌ندێ له‌و ژنه‌ ئێزدييانه‌ى له‌ده‌ست داعش قورتاريان بووه‌، ته‌نانه‌ت داوايان لێ كراوه‌ واز له‌ منداڵه‌كانيان بهێنن تا ڕێگه‌يان پێ بدرێ بچنه‌وه‌ ناو كه‌سوكاره‌كانيان.

"ژيان و گوزه‌رانێكى سه‌ختمان هه‌بوو"

دايك و بابى ئاڵان و لينا هێشتا شتێكى كه‌م له‌باره‌ى ژيانى ئه‌و چه‌ند ساڵه‌ى منداڵه‌كانيان ده‌زانن كه‌ يه‌خسيرى ده‌ستى داعش بوون. ئه‌وان ته‌نيا‌ ده‌زانن كه‌ ئه‌و هه‌ر دوو منداڵه‌ له‌گه‌ڵ يه‌ك خێزانى داعشدا ژياون كه‌ باوكه‌كه‌ ناوى "ئه‌بو عه‌لا" بووه‌. به‌يانييان، ئاڵان و لينا ده‌بوايه‌ پێش هه‌مووان له‌خه‌و ڕاببن و تێشت [نانی به‌يانى] ئاماده‌ بكه‌ن و ناوماڵ پاك بكه‌نه‌وه ‌و له‌ چێشتلێنانيشدا يارمه‌تيیان بده‌ن. لينا ده‌ڵێ: ئێمه‌ ژيان و گوزه‌رانێكى سه‌خت و دژوارمان هه‌بوو. هه‌ندێجار ئاڵان له‌گه‌ڵ منداڵه‌كانى ئه‌و خێزانه‌دا ياریى ده‌كرد. ئه‌و ماڵه‌ى كه‌ ئێوه‌ له‌گه‌ڵيان ده‌ژيان، چه‌ند منداڵيان هه‌بوو؟ لينا له‌ وه‌ڵامدا ده‌ڵێ: نازانم.

ده‌بێ ئه‌و خێزانه‌، خه‌ڵكى سووريا بووبن، چونكه‌ لينا و ئاڵان زۆر به‌ڕه‌وانى به‌ عه‌ره‌بیى سوورى قسان ده‌كه‌ن. منداڵه‌ ئازادبووه‌كانى ديكه‌ى ئێزدييان، هه‌يانه‌ به‌ ئينگليزى، به‌ ڕووسى يان  به‌ عه‌ره‌بيى ميسرى قسان ده‌كه‌ن. له ‌كاتێكدا ئاڵان زمانى دايكى كه‌ كرمانجييه‌ له‌بير كردووه‌، به‌ڵام تێ ده‌گا، به‌س نازانێ قسه‌ى پێ بكا. لينا زۆر جاران له ‌نێوان ئاڵان و دايك و باوكيدا، ته‌رجه‌مه‌يان بۆ ده‌كا.

دايك و باوكى لينا نازانن كه‌ داخوا لينا وه‌كوو زۆر كه‌سى ديكه‌ى ئێزدى ده‌ستدرێژيى سێكسیى كراوه‌ته‌ سه‌ر يان نا، ئايا چه‌ك به‌ ئاڵان دراوه‌ وه‌كوو هه‌ندێ منداڵى ديكه‌ى ڕفێندراو؟ دايكى ئاڵان، له‌يلا ئێزدۆ، نايه‌وێ له‌باره‌ى ئه‌م پرسيارانه‌وه‌ قسه‌ بكرێ و ده‌ڵێ: "منداڵان شت له‌بير ده‌كه‌ن." ئێستا ئه‌و شاد و شوكره‌ و باس له‌وه‌ ده‌كا چۆن پێش ساڵێك له‌ به‌غدا منداڵێ به ‌ناوى ئاڵان دۆزرايه‌وه‌ و ئه‌ويش وای زانيوه‌ كه‌ ئه‌وه‌ ئاڵانى كوڕى ئه‌وه‌، به‌ڵام كه‌ پشكنينى DNAى بۆ كراوه‌، ده‌رچووه‌ كه‌ كوڕى ئه‌و نييه‌. هێشتا DNA بۆ ئاڵان نه‌كراوه‌، لێ ئێزدۆ دڵنيايه‌ كه‌ ئاڵان كوڕى ئه‌وه‌. ئاخر له‌گه‌ڵ لينا پێكه‌وه‌ گه‌ڕاونه‌ته‌وه‌.

دايكى ئاڵان به‌كه‌يفه‌ كه‌ له‌م ڕۆژانه‌ى دواييدا هه‌ندێ نيشانه‌ى پێشكه‌وتن له‌ ئاڵاندا وه‌ده‌ركه‌وتوون. له‌و دوو شه‌وه‌ى دواييدا، كوڕه‌كه‌يان له‌ته‌ك ئه‌ودا له‌نێو جێگه ‌و له‌سه‌ر ته‌خت ڕاده‌كشێ، كه‌چى پێشتر له‌سه‌ر عه‌رد ده‌خه‌وت. ئێستا له‌يلا خان زۆر شاده‌ كه‌ هه‌ردووكيان شه‌وان خه‌وێكى قووڵ و خۆش ده‌يانباته‌وه‌ و ئاشكرايه‌ چيديكه‌ كابوس و مۆته‌كه‌ نابينێ و ئێسته‌ ئاڵان پايسكلێكى لێ ده‌وێ. له‌يلاى دايكى ده‌ڵێ: دوێنێ ئاماژه‌ى بۆ پايسكلێك و دواتر بۆ خۆى كرد و گوتى له‌ناو داعشدا به‌رپرسى چاكردنه‌وه‌ى پايسكلان بووه‌. به‌ڵام لينا ده‌ڵێ وا نييه‌ و ئه‌و وه‌خته‌ هه‌مووى، پێكه‌وه‌ له ‌يه‌ك ماڵدا بووين.

" پێشان وه‌سا نه‌بوو"

دايكى ئاڵان ده‌ڵێ: ده‌بێ ئاڵان جارێكی تر بگه‌ڕێته‌وه‌ قوتابخانه‌، چونكه‌ كه‌ گه‌ڕاوه‌ته‌وه،‌ ناوى له ‌لايه‌ن حكوومه‌تى هه‌رێمى كوردستانه‌وه‌ تۆمار كراوه‌ و ئومێدم وايه‌ به‌ چوونه‌ قوتابخانه‌ هێور بێته‌وه‌ و دابكه‌وێ. لێ ئێستاكه‌ تووڕه ‌و نيگه‌رانه‌. پێشان وه‌سا نه‌بوو.

شه‌ڕڤانه‌كانى SDF كه‌ باغوزيان گرته‌وه‌، ده‌ڵێن داعش سه‌رى ده‌يان كچ و ژنى ئێزدييان له‌ يه‌كێ له‌ دوا كشتوبڕ و جينايه‌ته‌كانياندا، بڕيوه‌ و له‌ گۆڕێكى به‌كۆمه‌لدا ناشتوويانن؛ ئاخر چه‌ندين گۆڕى به‌كۆمه‌ڵيان دۆزيوه‌ته‌وه‌ كه‌ ته‌رمى ئافره‌تى سه‌ربڕاويان تێدا بووه‌. ڕۆژنامه‌ى "دێلى مێل"ى بريتانیيش ده‌ڵێ، هێزه‌ تايبه‌ته‌كانى بريتانى سه‌رى ده‌وروبه‌رى 50 ئافره‌تيان له‌ناو چه‌ند سندووقێكى زبڵ و زاردا له‌ باغوز دۆزيوه‌ته‌وه‌.

له‌ ناوه‌ڕاستى مانگى ئاداردا، كاربه‌ده‌ستان يه‌كه‌مين گۆڕى به‌كۆمه‌ڵى ئێزديانيان له‌ كۆى 73 گۆڕ، له‌ گوندى كۆچۆى ناوچه‌ى شه‌نگال هه‌ڵدايه‌وه‌. كۆچۆ ئه‌و گونده‌يه‌ كه‌ "ناديه‌ موراد"ى لێ هاتۆته‌ دنيا. ناديه‌ كچێكى ئێزدييه‌ و ساڵى ڕابردوو خه‌ڵاتى نۆبڵى بۆ ئاشتى پێ درا، له‌ سه‌رينى ئه‌وه‌ى كه‌ به‌ره‌نگارى ده‌ستدرێژيى سێكسى و توندوتيژى ده‌بێته‌وه‌. تيرۆريستانى داعش ناديه‌ موراديان ڕفاندبوو و بۆ ماوه‌ى چه‌ند هه‌فته‌يه‌كيش له ‌لايان مابووه‌وه‌.

"زۆر به‌زه‌حمه‌ت ده‌دۆزرێنه‌وه‌"

زۆرينه‌ى پياوه‌كانى كۆچۆ له‌ناو بردران، لێ ئيدريس به‌شير سالۆ كه‌ يه‌كێكه‌ له‌وانه‌ى قورتاريان بووه‌، پاش ئه‌وه‌ى له‌و په‌لامار و هێرشه‌دا ته‌قه‌ له‌و و له‌ چه‌ند ئێزديى ديكه‌ ده‌كرێ، ئه‌و پياوه‌ بێزنسمانه‌ 46 ساڵييه‌ خۆى له‌ قۆرتێ ده‌شارێته‌وه‌ به‌ر له‌وه‌ى داعشه‌كان به‌ خۆ و ئامێرێكى عه‌ردهه‌ڵكه‌ندن بگه‌ڕێنه‌وه ‌و خاك و گڵ  به‌سه‌ر ته‌رمه‌كانياندا بكه‌ن. دۆستێكى عه‌ره‌ب، ساڵۆ ده‌باته‌ نه‌خۆشخانه‌ى مووسڵ و له‌وێ له‌ته‌ك بريندارێكى داعش ده‌خه‌وێ و پاشان هه‌ر ئه‌و دۆسته‌ى ده‌يگه‌يه‌نێته‌ ناوچه‌ى پڕئه‌من و ئه‌مانه‌تى كوردنشين. سالۆ له‌و ده‌مه‌وه‌، ئه‌ركى ده‌بێته‌ ڕزگاركردنى ژن و منداڵه‌ ڕفێندراوه‌كانى ئێزدييان و تا ئێستا 216 كه‌سى قورتار كردوون. هێشتا شونه‌وارى زێتر له‌ 1500 كه‌س ديار نييه.

‌ [به‌پێى ئامارى ئۆفيسى ڕزگاركردنى ئێزدييان كه‌ سه‌ر به‌ سه‌رۆكايه‌تيى حكوومه‌تى هه‌رێمى كوردستانه‌، هێشتا 2966 كه‌س ماون و چاره‌نووسيان نادياره‌ كه‌ 1360 كه‌سيان مێيینه‌ن و 1606 كه‌سيشيان نێرينه‌ن- ئاسۆ].

سالۆ ده‌ڵێ: زۆر له‌ ژن و منداڵه‌ ڕفێندراوه‌كان په‌رتوبڵاو بوون و لێك دابڕێندراون و خۆيان له‌ناو خه‌ڵكى مه‌ده‌نيدا ده‌شارنه‌وه‌‌ و تا دێ زه‌حمه‌تتر ده‌بيندرێنه‌وه‌. به‌ قسه‌ى سالۆ، زۆر تاقم و باندى جينايه‌تكار بازرگانى به‌ كه‌سه‌ ڕفێندراوه‌كان ده‌كه‌ن. سالۆ پێوه‌ندى و ڕايه‌ڵه‌ى خۆى له‌گه‌ڵ عه‌شيره‌ته‌ عه‌ره‌به‌كاندا به‌كار ده‌هێنێ بۆ شوێنهه‌ڵگرتن و ديتنه‌وه‌ى ئه‌و ڕفێنراوانه‌ و ده‌ڵێ: پێشتر ده‌بوايه‌ ده‌وروبه‌رى 300$ و هه‌ندێ جار ده‌گه‌يشته‌ 10000 دۆلار بۆ گه‌ڕاندنه‌وه‌ى كه‌سێك بده‌ين، لێ ئێسته‌ له‌ 10000 $ تێ په‌ڕيوه‌.

سالۆ دوو ژن و پێنج كچى له‌نێو ڕفێندراوه‌كاندا بوون و يه‌ك دواى يه‌كى دۆزينه‌وه ‌و ئێستا له‌ ئه‌ڵمانيا ده‌ژين و له‌وێ مامه‌ڵه‌ى باشتريان له‌گه‌ڵدا ده‌كرێ و ته‌نيا خۆى له‌ باكوورى عێراقدا ماوه‌ته‌وه ‌و ده‌ڵێ، ده‌يه‌وێ هه‌موو ئه‌وانه‌ى بزر بوون و ڕفێندراون بگه‌ڕێنێته‌وه‌ نێو كه‌سوكاريان.

سەرچاوە:

https://www.spiegel.de