 |
وەرگێڕانی لە ئینگلیزییەوە: ئاسۆ کەریم
پۆپۆليزم و ديموكراسى
يه‌كێ له پانتاييیه تايبه‌ته گرنگه‌كانى لێكۆڵينه‌وه له‌نێو زاناكانى بوارى پۆپۆليزمدا، پێوه‌نديى به ده‌ره‌نجامه‌كانى ئه‌و دياره‌ده‌يه ده‌رهه‌ق به حوكمڕانيى ديموكراتيك هه‌يه. له ڕاستيدا، هزره ناكامڵ و پێنه‌گه‌ييوه‌كانى پۆپۆليزم وه‌كوو ژه‌هر بۆ ديموكراسى، ڕۆڵێكى ناوه‌ندیى له ژياندنه‌وه‌ى ديراسه‌ى ئه‌كاديمييانه‌ى پۆپۆليزم له ده‌يه‌ى ڕابردوودا گێڕاوه. بۆ نموونه، له 2010دا، سه‌رۆكى يه‌كێتيى ئه‌وروپى (EU)، هێرمان ڤان ڕومپۆى، له ئاماژه‌كردنێكدا بۆ هه‌ڵكشانى حزبه ڕاستڕه‌وه‌كانى دژ به خه‌ڵكى لايده و بيانى له چه‌ند ده‌وڵه‌تێكى ئه‌ندام له EUدا [ 74] ڕای گه‌ياند كه پۆپۆليزم "خه‌ته‌رى هه‌ره گه‌وره‌يه له‌سه‌ر ئه‌وروپا." چاودێرێكى ديكه، به‌ڵام له بوارى ئه‌كاديميادا، پۆپۆليزم به "ڤايرۆس"ێك ده‌شوبهێنێ كه له سيسته‌مگه‌لى حزبايه‌تیدا بێ له سه‌رانسه‌رى ئه‌وروپادا و كاريگه‌رييه درمييه‌كانى خۆى تێدا بڵاو كردبێته‌وه. [75]
له‌گه‌ڵ ئه‌وه‌یشدا، به‌پێچه‌وانه‌ى ئه‌و تێڕوانينه باوه نێگه‌تيڤه‌ى له‌ڕاست پۆپۆليزم له ئه‌وروپادا هه‌يه (ئه‌م تێڕوانينه خۆى له خۆيدا ميراتێكى مێژووى قڕێژ و چه‌په‌ڵى ئه‌وروپايه له‌گه‌ڵ سياسه‌تى ئۆتۆريته و ملهوڕانه‌ى پۆپۆليستيدا)، هه‌ندێ لێكۆڵه‌ر پێ له‌سه‌ر ئه‌وه داده‌گرن كه پۆپۆليزم له ڕاستيدا ده‌كارێ پشتيوانیى سياسه‌تگه‌ڵێك بكا كه به‌شداريپێكردنى ديموكراتيكانه به‌فره‌تر بكا به جۆرێ كه گرووپه په‌راوێزخراوه‌كانى جارانيش بگرێته‌وه، وه‌ك له نموونه و شه‌پۆڵى ئه‌م دواييیه‌ى پۆپۆليزمى چه‌پڕه‌و له ئه‌مريكاى لاتيندا ده‌بينرێ. به پشتبه‌ستن و سووربوون له‌سه‌ر ئه‌م ئه‌رگيومێنته ناخويا و ناڕوونانه، تا هاتووه زانا و لێكۆڵه‌ران سه‌رنجى ئه‌و پرسه‌يان داوه كه داخوا ده‌بێ پۆپۆليزم وه‌ك هه‌ڕه‌شه‌يه‌ك بۆ سه‌ر ديموكراسى چاوى لێ بكرێ يان وه‌كوو بزاوێكى ڕاستكه‌ره‌وه و هێنانه‌وه‌سه‌رڕێى ديموكراسى. [76 ] ئه‌م پرسه له ڕوانگه‌ى تيۆریى ديموكراتى و لێكۆڵينه‌وه‌ى ئه‌زموونييه‌وه خراوه‌ته به‌ر باس و لێكدانه‌وه كه داخوا سياسه‌تى پۆپۆليستى چ كاريگه‌رييه‌كى له‌سه‌ر جۆر و چلۆنايه‌تیى ديموكراسى هه‌بووه؟
له نوخته‌نيگا و تێڕوانينى تيۆريى سياسييه‌وه، ئۆربيناتى (Urbinati) [77] جه‌خت له‌وه ده‌كاته‌وه كه پۆپۆليزم ستراتيژیيه‌كه بۆ هاوسه‌نگكردنه‌وه‌ى دابه‌شكردنى ده‌سه‌ڵاتى سياسى له نێوان گرووپه كۆمه‌ڵايه‌تييه‌كانى ئارا و ئه‌و گرووپانه‌ى له بارى سه‌رهه‌ڵدان و هاتنه‌مه‌يداندان. ئه‌و خانمه پێی وايه كه گرژيى نێوان ديموكراسيى ليبراڵ و پۆپۆليزم له‌و شێوازانه سه‌ر هه‌ڵده‌دا كه ئايديۆلۆژيیه‌كان چۆن له پێوه‌ندييه‌كانى نێوان داموده‌زگه نوێنه‌رايه‌تييه‌كان و "خواست و ويستى گه‌ل" ده‌گه‌ن. هه‌ر ئه‌و خانمه، پێ له‌سه‌ر ئه‌وه‌یش داده‌گرێ كه به لاى پۆپۆليسته‌كانه‌وه، ئه‌ركى سه‌ره‌كيى داموده‌زگه سياسييه‌كان بريتى نييه له خزمه‌تكردن وه‌كوو سيسته‌مگه‌لێكى and balances checks، يان وه‌كوو پارێزه‌رێكى مافه مه‌ده‌نييه‌كان، به‌ڵكه ئه‌و داموده‌زگه سياسييانه، ئامرازگه‌لێكى به‌كارن بۆ ده‌ربڕين و ته‌رجه‌مه‌كردنى خواست و ويستى زۆرينه بۆ بڕيارگه‌لى سياسى.
كنۆڤن (Canovan)يش ته‌كه‌ز له‌سه‌ر گرژييه ڕه‌گداكوتاوه‌كانى ناو هه‌ناوى ديزاينى بنياديى ديموكراسيدا ده‌كاته‌وه: ديموكراسى وه‌كوو ئايديۆلۆژی و پراكتيكێكى به‌شداريى ميللى، لێ له هه‌مان كاتدا پێويستى به سيسته‌مێكى ئاڵۆزى بڕياردان هه‌يه كه زۆرتر ناخويايه؛ له سۆنگه‌ى ئه‌مه‌وه ئه‌كته‌ره پۆپۆليسته‌كان شك و گومان و ناڕه‌زايیيه‌كى قووڵيان له به‌رانبه‌ر داموه‌ده‌زگه نوێنه‌رايه‌تييه‌كاندا هه‌يه. له ئه‌نجامدا ئايديۆلۆژيى پۆپۆليستى، ده‌يه‌وێ ڕه‌وش و بارى كاروباره‌كان چا بكاته‌وه، "به‌و بيانووه‌ى كه شه‌رعيیه‌ت له‌سه‌ر بنه‌ماى ئايديۆلۆژيى ديموكراتيى سه‌روه‌ريى ميللى و حوكمى زۆرينه ڕاده‌وه‌ستێ"- ئه‌مه‌یش گه‌ڕانه‌وه‌يه‌كه بۆ ديموكراسيى "ڕاسته‌قينه" كه له لايه‌ن خه‌ڵكه‌وه پێشه‌نگايه‌تى بكرێ، نه‌ك له ڕێگه‌ى ده‌سته‌بژێره پرۆفيشناڵه سياسييه‌كانه‌وه. [78] له كاتێكدا كنۆڤن پۆپۆليزمى پێ سايه و سێبه‌رێكى ديموكراسييه، ئارديتى (Arditi) پێی وايه پۆپۆليزم "تارمايیى ديموكراسييه": "تارماييیه‌ك هه‌م له گه‌ڕان و سووڕاندايه وه‌كوو گه‌ڕانه‌وه‌ى باوكى هاملێت و، هه‌م شتێكى وه‌سايه كه بتوانێ ڕاومان بنێ وه‌كوو تارماييیه‌كه‌ى كۆمۆنيزم."
ئارديتى (Arditi) قامك بۆ ئه‌وه ڕاده‌كێشێ كه ده‌كرێ سه‌يرى پۆپۆليزم وه‌ك "ميوانێكى بێسه‌روبه‌رى شێو" بكرێ، ميوانێ مه‌ست ببێ و پرسيارى نابه‌جێ بكا؛ ده‌كرێ ئاماژه بۆ گرفت و ئاريشه‌گه‌لێكى شاراوه‌ى گرنگ بكا [79] . ئه‌م ميتافۆره ڕه‌نگاوڕه‌نگه، به‌جوانى ده‌ست له‌سه‌ر دواليزمى نێوان سياسه‌تى پۆپۆليستى و ديموكراسى داده‌نێ: پۆپۆليزم به‌ره‌نگارى ماناى گشتيى پراكتيكى ديموكراتيى ليبراڵ ده‌بێته‌وه و له‌وانه‌يه شونه‌وارى به‌د و ناحه‌زى بۆ سه‌ر ديموكراسيى ليبراڵ هه‌بێ، له هه‌مان كاتدا پۆپۆليزم له‌وانه‌يه خزمه‌ت به دياريكردنى ئه‌و گرفته سياسييانه بكا كه فرامۆش كراون و ده‌نگێكى ڕه‌وا بۆ گرووپه په‌راوێزخراوه‌كان په‌يدا بكات.
تواناى سياسه‌تى پۆپۆليستى بۆ باشتركردنى كوالێتيى ديموكراسى له شيكردنه‌وه‌كه‌ى پۆستيل (Postel) [80] بۆ حزبى پۆپۆليستى ئه‌مريكى قسه‌ى لێ كراوه. پۆستيل شرۆڤه‌ى هه‌ڵكشانى حزبى پۆپۆليستى ئه‌مريكى ده‌كا وه‌ك وه‌ڵامدانه‌وه‌يه‌كى بێبازاڕ [بێهه‌ڕمێن، بێبره‌وى]ى ئابوورى له كۆتايیى سه‌ده‌ى نۆزده‌یه‌‌مدا و داهێنانه ته‌كنه‌لۆژييه‌كان له بوارى گواستنه‌وه، به‌رهه‌مهێنانى پيشه‌سازى، كۆميونيكێشن و بازرگانيى جيهانيدا. بزووتنه‌وه‌ى پۆپۆليستى بريتى بووه له هاوپه‌يمانێتييه‌كى وه‌رزێر، پاڵه و چالاكوانه‌كانى چينى ناوه‌ڕاست، كه پێكه‌وه كاريان بۆ به‌ره‌نگاربوونه‌وه‌ى واقعه دژواره ئابوورى و سياسييه‌كانى سه‌رده‌مى خۆيان ده‌كرد. به‌پێچه‌وانه‌ى هه‌ندێ لێكدانه‌وه، پۆستيل سه‌يرى سه‌رهه‌ڵدانه‌وه‌ى پۆپۆليستى ده‌كا، نه وه‌كوو ئۆپۆزيسيۆنێكى كۆنه‌په‌رستانه، يان وه‌كوو ڕه‌تكردنه‌وه‌يه‌مى ديموكراسى، به‌ڵكه وه‌كوو ململانه‌يه‌ك له پێناو چاكسازيى ئابوورى له ڕێگه‌ى به‌شداريبوونێكى زۆرترى ديموكراتييانه‌وه. له ڕاستيدا، پۆستيل پيله‌كه ده‌كا كه حزبى پۆپۆليستى ئه‌مريكى به مليۆنان هاووڵاتیى په‌راوێخراوى به شێوه‌يه‌كى ديموكراتييانه‌ى موكم ساز دا، وێڕاى كه ئايديۆلۆژيى ئه‌و حزبه، بوارێكى كه‌مى بۆ مافه‌كانى كه‌مينه هێشتبووه‌وه.
له كاتێكدا هه‌ڵوێستى پۆپۆليزم له‌باره‌ى پێوه‌ندييه‌كانى نێوان زۆرينه- كه‌مينه ناخويايه به لاى پۆستيله‌وه، لێ له تۆژينه‌وه‌كانى كالتواسه‌ر (2013) و كالتواسه‌ر و مود (2012)دا زۆر ته‌كه‌ز له‌سه‌ر ئه‌و پێوه‌ندييانه كراوه‌ته‌وه. به لاى ئه‌و دوو لێكۆڵه‌ره‌وه، پۆپۆليزم ديارده‌ده‌يه‌كه له ڕووى بنه‌ڕه‌تييه‌وه له‌گه‌ڵ شێوه و ناوه‌ڕۆكه جياجياكانى ديموكراسيدا، ناته‌با و ناكۆكه. كالتواسه‌ر (2013) له‌سه‌ر بنه‌ماى تيۆريى polyarchy * ڕۆبرت دال، لێكۆڵينه‌وه‌ى پێوه‌ندييه‌كانى نێوان پۆپۆليزم و دوو ئالينگاريى سه‌ره‌كى له تيۆريى ديموكراتيدا بنيات ده‌نێ: پێناسه‌كردنى گه‌ل و سنووره‌كانى خۆحوكمكردن (خۆبه‌ڕێوه‌بردن). سياسه‌ته پۆپۆليسته‌كان له ده‌ورى ئه‌م دوو ته‌نگژه سه‌ره‌كييه ديموكراتييه ده‌سووڕێنه‌وه؛ له‌گه‌ڵ ئه‌وه‌یشدا، ئه‌و ڕێگه و شێوازانه‌ى كه سه‌ركرده پۆپۆليسته‌كان وه‌ڵامى ئه‌م پرسيارانه‌ى پێ ده‌ده‌نه‌وه، به‌گوێره‌ى پێڤاژۆ و هه‌لومه‌رجه‌كان ده‌گۆڕێن. له كاتێكدا پۆپۆليسته‌كانى ئه‌وروپا جه‌خت له‌سه‌ر ڕه‌هه‌ندى ئيتنيى گه‌ل ده‌كه‌نه‌وه، ئه‌وا پۆپۆليسته‌كانى ئه‌مريكا (به‌تايبه‌تى حزبىTea ) ته‌كه‌ز له‌سه‌ر كۆچبه‌رى و داخوازييه دژه- داموده‌زگه‌كان ده‌كه‌ن؛ هه‌رچى پۆپۆليسته‌كانى ئه‌مريكاى لاتينن، هه‌وڵ ده‌ده‌ن پێكهاته جياجيا ئيتنى و كۆمه‌ڵايه‌تى- ئابوورييه‌كان وشيار بكه‌نه‌وه.
كاردانه‌وه پۆپۆليستييه‌كان بۆ پرسى خۆكۆنترۆڵكردن، ديسان جياواز و ده‌گۆڕێن: له ئه‌وروپا، يه‌كێتيى ئه‌وروپى وه‌كوو هه‌ڕه‌شه‌يه‌ك بۆ سه‌ر سه‌روه‌ريى گه‌ل ده‌بينرێ كه خۆى له داموده‌زگه نه‌ته‌وه‌ييیه‌كاندا ده‌بينێته‌وه؛ له ئه‌مريكاى لاتيندا پۆپۆليسته‌كان پێيان وايه ده‌ستووره كۆنه‌كان به ده‌ردى پێداويستييه‌كانى گه‌ل ناخۆن؛ له ويلايه‌ته يه‌كگرتووه‌كانى ئه‌مريكایشدا پۆپۆليسته‌كان به شێوه‌يه‌كى نموونه‌يى سه‌يرى ده‌ستوور (واته به‌گوێره‌ى لێكدانه‌وه‌ى خۆيان بۆ ده‌ستوور) ده‌كه‌ن و پێيان وايه حكوومه‌ت مافه ده‌ستوورييه‌كانى ئه‌وان پێشێل ده‌كا. له‌م پێداچوونه‌وه هه‌مه‌گيره به پۆپۆليزمى سێ كيشوه‌رى لێكجيادا (ئه‌وروپا، ئه‌مريكاى لاتين، ئه‌مريكاى باكوور)، به قسه‌ى كالتواسه‌ر، سياسه‌تى پۆپۆليستى، خۆى له خۆيدا ئه‌نتى-ديموكراتى نييه؛ به‌ڵكه سياسه‌ته پۆپۆليستییه‌كان وه‌ڵامگه‌لێكى جياوازى ئه‌و گرژييه به‌رده‌وامانه ده‌ده‌نه‌وه كه له‌مێژه جێگه‌ى خۆيان له‌ناو تيۆرييه سياسييه‌كاندا كردووه‌ته‌وه.
ڕوانگه‌يه‌كى زۆر نزيك و هاوشێوه‌ى ئه‌وه له به‌رگه كتێبێكى كالتواسه‌ر و مود (2012) خراوه‌ته ڕوو، كه ته‌كه‌ز ده‌كاته سه‌ر پێوه‌ندييه‌كانى نێوان پۆپۆليزم و ديموكراسى. به‌پێچه‌وانه‌ى ڕاوبۆچوونى باو، ئه‌و دوو نووسه‌ره، پێيان وايه پۆپۆليزم له ڕاستيدا به شێوه‌يه‌كى پۆزه‌تيف به ديموكراسى گرێدراوه، چونكه پۆپۆليزم ته‌كه‌ز ده‌كاته سه‌ر نوێنه‌رايه‌تيكردن و به‌رجه‌سته‌كردنى خواست و ويسته‌كانى گه‌ل. ئه‌و دوو دانه‌ره، نوێنه‌رايه‌تيكردن و سازدانى گرووپه په‌راوێزخراوه‌كان، بنياتنان و پێكهێنانى هاوپه‌يمانێتیى سياسيى سه‌رووى چينه‌كان و جه‌ختكردنه‌وه له‌سه‌ر به‌رپرسيارێتيى ديموكراتى، ده‌خه‌نه ناو ليستى كاريگه‌رييه پۆزه‌تيڤه‌كانى پۆپۆليزمه‌وه. هه‌رچى پێوه‌نديى نێوان پۆپۆليزم و ديموكراسيى ليبراڵه، به سروشت پێوه‌ندييه‌كى ناته‌بايه، چونكه پۆپۆليزم حوكمڕانيى زۆرينه ده‌خاته سه‌رووى به‌ها و ئايدياڵه ديموكراتييه ليبراڵه‌كانه‌وه، وه‌كوو "چێك و به‌لانسه‌كان"ى نێوان داموده‌زگه ده‌ستوورييه‌كان، ڕاوێژ و مافه‌كانى كه‌مينه [81]. وه‌ك ئه‌نجامێك، بانگه‌وازه سه‌ركه‌وتووه پۆپۆليسته‌كان، مه‌ترسييان بۆ سه‌ر ناجێگيريى داموده‌زگه ديموكراتيكه‌كان هه‌يه و، به‌ره‌نگاریى جياكردنه‌وه‌ى ده‌سه‌ڵاته‌كان ده‌كه‌ن و، متمانه به ده‌سته نا هه‌ڵبژێردراوه‌كانى حكوومه‌ت له‌ق ده‌كه‌ن، له‌وما، كالتواسه‌ر و مود [82] ئاماژه بۆ ئه‌وه ده‌كه‌ن كه پۆپۆليزم "ده‌كرێ هه‌م هه‌ڕه‌شه‌يه‌ك بێ بۆ سه‌ر ديموكراسى و هه‌م ڕاستكه‌ره‌وه‌يه‌ك"؛ ئه‌وه‌یش ده‌وه‌ستێته سه‌ر دوو فاكته‌رى پێڤاژۆيى: پله‌ى پته‌وى و ڕه‌گداكوتاویى سيسته‌مى ديموكراتى [83] و، دووه‌ميان داخوا پۆپۆليسته‌كان له به‌ره‌ى ئۆپۆزيسيۆندان يان له‌ناو حكوومه‌تدان. له ديموكراسێتييه پته‌و و ڕه‌گداكوتاوه‌كاندا، ئه‌گه‌ر پۆپۆليزم له به‌ره‌ى ئۆپۆزيسيۆندا بێ، ڕه‌چاوى شوێنه‌وارى بچووكى پۆزه‌تيڤ له‌سه‌ر كوالێتيى ديموكراسى ده‌كرێ، له كاتێكدا پۆپۆليزم ئه‌گه‌ر له‌ناو حكوومه‌تدا بێ، شوێنه‌وارێكى ميانڕۆى له‌سه‌ر ديموكراسى ده‌بێ، جا چ به نێگه‌تيڤ بێ يان به پۆزه‌تيڤ. له لايه‌كى ديكه‌وه، له ديموكراسێتييه خۆنه‌گرتووه‌كاندا، ئه‌گه‌ر پۆپۆليزم له حكوومه‌تدا بێ، چاوه‌ڕوان ده‌كرێ كاريگه‌ريى زۆر نێگه‌تيڤى بۆ سه‌ر ديموكراسى هه‌بێ، له كاتێكدا ئه‌گه‌ر له به‌ره‌ى ئۆپۆزيسيۆندا بێ، ده‌كرێ وه‌كوو ڕاستكه‌ره‌وه‌يه‌كى ديموكراسى خزمه‌ت بكا.
له‌ڤيستكى و لۆكستۆن [84] له ڕووى ئه‌و تێڕوانينه زۆر گه‌شبينه ده‌وه‌ستنه‌وه، كه گوايا پۆپۆليزم كاريگه‌ريى له‌سه‌ر ديموكراتيزه‌كردن هه‌يه. ئه‌وانه ده‌ڵێن له كاتێكدا له‌گينه پۆپۆليزم كاريگه‌ريى پۆزه‌تيڤى له ديموكراسێتييه ليبراڵه‌كاندا هه‌بێ، لێ له ديموكراسێتييه ناخۆگرتووه‌كانى ئه‌مريكاى لاتيندا خزمه‌ت به په‌ره‌سه‌ندنى زێترى داموده‌زگه ديموكراتييه‌كان ده‌كا- هه‌روا ياريده‌ى به‌شداريى زێترى سياسيیش ده‌دا. چه‌ندين هۆكار بۆ ئه‌م ئه‌نجامه ناخويا و لێڵه هه‌ن: يه‌كه‌ميان، عاده‌ته‌ن پۆپۆليسته‌كان خه‌ڵكێكن له ده‌ره‌وه‌ى داموده‌زگه نوێنه‌رايه‌تييه‌كانى ديموكراسیدان، له‌وما قه‌ده‌رى ئه‌و ده‌زگه‌يانه نازانن؛ دووه‌ميان، پۆپۆليسته‌كان باوه‌ڕيان وايه كه ئه‌وان گه‌ل ڕێگه‌ى پێ داون شه‌ڕى دامه‌زراوه‌ى سياسيى وڵات بكه‌ن، ديماهييه‌كه‌ى، سه‌ركرده پۆپۆليسته‌كان زۆر جاران به‌رهه‌ڵستى په‌رله‌مان، بيرۆكراسى و دادگه‌ى باڵا ده‌كه‌ن و له‌وما پاڵنه‌ر و ئه‌نگێزه‌يه‌كى به‌هێزيان هه‌يه بۆ لاوازكردن و نابوودكردنى ئه‌م دامه‌زراوانه و له ئه‌نجامدا لۆكستۆن و ليڤسكى (2012) ئاماژه بۆ ئه‌وه ده‌كه‌ن كه سه‌ركرده پۆپۆليسته‌كان له ديموكراسێتييه ناخۆگرتووه‌كاندا له‌وانه‌يه له ڕێگه‌گه‌لێكى گرنگدا به‌شدارى له بێهێزكردنى داموده‌زگه ديموكراتيكه‌كاندا بكه‌ن و له هه‌ندێ باردا ته‌نانه‌ت بچنه ناو ده‌سه‌ڵاتڕانييه‌كى ملهوڕى ڕقابه‌رايه‌تيشه‌وه [85 ].
سەرچاوە:
74- Mudde, Cas and Cristóbal Rovira Kaltwasser (eds.). 2012. Populism in Europe and the Americas. Cambridge: Cambridge University Press, p.16.
75- Bartolini, Stefano. ‘Political Parties, Ideology and Populism in the Post-Crisis Europe’. Poros Conference 7-10 July 2011.
76- Mudde, Cas and Cristóbal Rovira Kaltwasser (eds.). 2012. Populism in Europe and the Americas. Cambridge: Cambridge University Press. See also Subramanian, Narendra. 2007. ‘Populism in India’, SAIS Review, Vol. 27(1), pp. 81–91.
Subramanian, Narendra. 1999. Ethnicity and Populist Mobilization: Political Parties, Citizens and Democracy in South India. Oxford: Oxford University Press.
77- Urbinati, Nadia. 1998. ‘Democracy and Populism’. Constellations, Vol. 5(1), pp. 110–124.
78- Canovan, Margaret. 2002. ‘Taking Politics to the People: Populism as the Ideology of Democracy’, in: Meny, Yves and Yves Surel (eds.), Democracies and the Populist Challenge. New York: Palgrave, pp. 25-44, p.28.
79- Moffitt, Benjamin. 2010 ‘Guess Who’s Coming to Dinner? Populism as the Awkward Dinner Guest of Democracy’, Connected Globe, Conflicting Worlds: Australian Political Studies Association Conference, University of Melbourne.
80- Postel, Charles. 2007. The Populist Vision. Oxford: Oxford University Press.
- Poly واته زۆر يان فره، archy حوكمڕانى؛ به‌و مانايه ده‌بێته حوكمڕانيى زۆرينه، وه‌ك چۆن ئۆليگارشى ده‌بێته حوكمڕانيى كه‌مينه.
81- Pappas, Takis S. 2013. ‘Populist Democracies: Post – Authoritarian Greece and Post-Communist Hungary’, Opposition and Government.
82- Mudde, Cas and Cristóbal Rovira Kaltwasser (eds.). 2012. Populism in Europe and the Americas. Cambridge: Cambridge University Press, p. 16.
83- A consolidated democracy is defined as “a political regime in which free and fair elections are institutionalized as the mechanism whereby access to political power is determined” (p. 22).
84- Levitsky, Steven and James Loxton. 2012. Populism and competitive authoritarianism: the case of Fujimori’s Peru. In: Mudde, Cas and Cristóbal Rovira Kaltwasser (eds.). Populism in Europe and the Americas. Cambridge: Cambridge University Press. Levitsky, Steven and James Loxton. 2013. ‘Populism and competitive authoritarianism in the Andes’, Democratization, Vol. 20 (1), pp. 107-136(30)
85- Levitsky, Steven and Lucan A. Way. 2010. Competitive Authoritarianism: Hybrid Regimes After the Cold War. Cambridge: Cambridge University Press.